کر غزستان کی پارلیمنٹ کے سپیکر پاکستان کے 3 روزہ دورے پر کل اسلا م آباد پہنچیں گے

اسلام آباد (این این آئی) سپیکر قومی اسمبلی سردار ایاز صادق کی دعوت پر کرغستان کی پارلیمنٹ کے سپیکر Mr. Chynybai A. Tursunbekov پارلیمانی وفد کے ہمراہ 13 مارچ سے 15 مارچ تک پاکستان کا دورہ کریں گے۔ڈپٹی سپیکرمرتضٰی جاوید عباسی قومی اسمبلی کے اعلی افسران کے ہمراہ بے نظیر بھٹو انٹرنیشنل ایئر پورٹ پر کرغستان کے سپیکر اور پارلیمانی وفد کا استقبال کریں گے۔کرغستان کے سپیکر کا یہ دورہ کسی بھی کرغستانی سپیکر کا پاکستان کا پہلا دورہ ہے۔پاکستان میں قیام کے دوران پارلیمانی وفد صدرمملکت، وزیراعظم، چیئرمین سینٹ، سپیکر قومی اسمبلی اور وفاقی وزیر برائے پانی وبجلی سے ملاقاتیں کرے گا۔ دونوں پارلیمانوں کے سپیکر مفاہمتی یادشتوں پردستخط کریں گے۔ ملاقاتوں میں پاکستان کی قومی اسمبلی اور کرغستان کی پارلیمنٹ کے مابین رابطوں میں اضافے اور دونوں ممالک کے درمیان اقتصادی تعاون کوفروغ دینے کے امکانات کا جائزہ لیا جائیگا۔ کرغستان کے سپیکر Mr. Chynybai A. Tursunbekov قومی اسمبلی میں قائم پاکستان، کرغستان دوستی گروپ سے بھی خطاب کریں گے۔