اس موقع پر 142 ہاٹ ایئر بلون اڑائے گئے جن سے العلا کا آسمان روشنیوں سے جگمگا اٹھا
سعودی عرب کے تاریخی اور سیاحتی مقام العلا نے ایک اور نیا ریکارڈ قائم کر دیا ہے۔ العلا میں دنیا کا سب سے بڑا ہاٹ ایئر بلون شو منعقد کیا گیا تھا جسے گنیز بک آف ورلڈ ریکارڈز میں شامل کرلیا گیا ہے۔ عرب میڈیا کے مطابق یہ کامیابی سعودی بلون آرگنائزیشن ”سحاب“ کے تعاون اور شرکت سے ممکن ہو سکی ہے۔ہاٹ ایئر بلون شو کا اہتمام العلا کے تاریخی مقام الحجر کے قریب کیا گیا تھا۔ اس موقع پر 142 ہاٹ ایئر بلون اڑائے گئے جن سے العلا کا آسمان روشنیوں سے جگمگا اٹھا۔تاریخی اور سیاحتی مقام العلا میں 2019ء میں بھی ہاٹ ایئر بلون شو منعقد کیا گیا تھا اور اس وقت 100 غبارے اڑائے گئے تھے۔ یہ اپنی نوعیت کا پہلا ریکارڈ تھا جبکہ اس بار 142 بلون اڑا کر نیا ریکارڈ قائم کیا گیا ہے۔یہاں تاریخی میلے کے موقع پر العلا رائل کمیشن اور سعوی بلون آرگنائزیشن سحاب کے درمیان مفاہمتی یادداشت پر دستخط ہوئے جس کے تحت فریقین العلا کو مملکت میں بلونز کا دارالحکومت بنائیں گے۔اِن دنوں یہاں العلا میلے کا انعقاد کیا جا رہا ہے جس کا سلسلہ 12 مارچ تک جاری رہے گا۔ میلے کا آغاز دسمبر 2021ء سے ہوا تھا۔اس سے قبل ”طنطورہ ونٹر میلہ“ ہوا تھا جس کے بعد ”العلا آرٹ میلہ“ کا انعقاد کیا گیا تھا اور اب ”سما العلا“ کے نام سے تیسرا میلہ جاری ہے۔
