کراچی (اسٹاف رپورٹر) کراچی کے شارع فیصل پر نرسری کے قریب 16منزلہ عمارت میں آگ لگ گئی جو آخری اطلاعات تک بجھائی جارہی تھی۔ذرائع کے مطابق آگ عمارت کے اوپر لگے سائن بورڈ میں لگی جس کے بعد اس نے پوری عمارت کو اپنی لپیٹ میں لے لیا ہے۔ ذرائع کے مطابق ابتدائی طور پر فائر بریگیڈ کی3گاڑیاں موقع پر موجود ہیں جبکہ اسنارکل کو بھی طلب کر لیا گیا ہے۔
16منزلہ عمارت میں لگی آگ کے شعلے کئی کلومیٹر دور سے نظر آرہے ہیں، جبکہ آگ سے متاثرہ عمارت کی چیزیں بھی نیچے گر رہی ہیں۔ شاہراہ فیصل سے ائیر پورٹ جانے والے ٹریک پر کچھ دیر کیلئے ٹریفک بند کیا گیا تھا تاہم اب اسے ٹریفک کیلئے کھول دیا گیا ہے جبکہ پولیس اور رینجرز کی نفری بھی موقع پر موجود ہے۔ فائر برگیڈ حکام کا کہنا ہے کہ آگ 16 منزلہ عمارت میں لگی ہے، عمارت میں کمرشل دفاتر ہیں، 5 فائر ٹینڈرز کی مدد سے آگ بجھانے کی کوششیں جاری ہیں، مزید فائر ٹینڈرز اور اسنارکلز طلب کر لی گئی ہیں۔