لاہور (کامرس رپورٹر )  پیاف کے مرکزی آفس گلبرگ میں پیپر مارکیٹ گنپت روڈ،شاہ عالم مارکیٹ، ینگ ٹریڈرز ایسوسی ایشن، بیڈن روڈ و دیگر مارکیٹوں کے وفود نے دورہ کیا۔ مارکیٹس وفودکی قیادت سابق چیئرمین اپما خامس سعید بٹ ، شہزاد اسلم اور طاہر حفیظ نے کی۔چیئرمین پیاف فہیم الرحمن سہگل،پیٹرن انچیف پیاف و نائب صدر سارک چیمبر میاں انجم نثار ،سینئر نائب صدر لاہور چیمبر ظفر محمود چودھری و دیگر نے وفود کا استقبال کیا۔ میاں انجم نثار اور چیئرمین پیاف فہیم الرحمان سہگل نے کہا تاجر برادری کی بڑی نمائندہ جماعت پیاف لاہور چیمبر کے الیکشن میں مثالی کامیابی حاصل کرے گی۔ پیاف کا منشور کاروباری طبقہ کے مسائل کو ترجیحی بنیادوں پر حل کروانا ہے۔ انہوں نے کہا لاہور چیمبر کے انتخابات کیلئے ضروری ہے کہ ممبران لاہور چیمبر کی سالانہ ممبر شپ کی تجدید 31 مارچ  تک لازمی کروالیں تاکہ وہ آئندہ الیکشن میں وہ اپنا حق رائے دہی استعمال کر سکیں۔