گوجرانوالہ(نمائندہ خصوصی )صدر پولیس نے روڈ رابری اور موٹر سائیکل چوری کی متعدد وارداتوں میں مطلوب چھ ملزمان کو گرفتار کرکے انکے قبضہ سے لاکھوں روپے نقدی ،موٹر سائیکل اور اسلحہ بر آمد کر لیا تفصیلات کے مطابق سٹی پولیس آفیسر محمد ایاز سلیم نے ضلع بھر میں ڈکیتوں، چوروں اور جرائم پیشہ افراد کے خلاف سخت کاروائیاں کرنے کے احکامات جاری کر رکھے ہیں انہی احکامات کے پیش نظر ایس پی سول لائن بلال محمود سلہری کی زیر قیادت، ڈی ایس پی پیپلز کالونی غازی عارف محمود خان کی زیر نگرانی، ایس ایچ او صدر گوجرانوالہ انسپکٹر قیصر عباس نے اپنی پولیس ٹیم کے ہمراہ روڈ رابری اور موٹر سائیکل چوری کی متعدد وارداتوں میں ملوث نفیس عرف نفیسو گینگ کے تین ارکان کو گرفتار کرکے ان کے قبضہ سے تین لاکھ پچیس ہزار روپے نقدی، ایک عدد موٹرسائیکل و اسلحہ برآمد کر لیا جبکہ وقار عرف وقارو گینگ کے تین ارکان کو بھی گرفتار کر کے ان کے قبضہ سے دو لاکھ تیس ہزار روپے نقدی برآمد کر لی۔ گرفتار کیے گئے ملزمان میں نفیس، ذوہیب، حارث، وقار، عمیر اور عمر شامل ہیں۔