انٹرنیشنل یوتھ فیسٹیول : پاکستان نے رسہ کشی‘ جو جسٹومیں میدان مار لیا

 لاہور (سپورٹس رپورٹر) پنجاب انٹرنیشنل فیسٹیول کے چوتھے روز پاکستان نے جوجسٹو اور رسہ کشی میں میدان مار لیا۔ دوستی ہاکی کپ بھارتی پنجاب کے نام رہا۔ فٹ بال مقابلوں میں پاکستان گرین کو سربیا کے ہاتھوں شکست کا سامنا کرنا پڑا۔ پنجاب حکومت کی زیرنگرانی لاہور میں جاری پنجاب انٹرنیشنل سپورٹس فیسٹیول جوجسٹو مقابلوں میں قومی ٹیم تین گولڈ میڈلز کے ساتھ پہلے نمبر پر براجمان ہے جبکہ ایران دوسرے اور موریشس تیسرے نمبر پر ہے۔ انڈوپاک پنجاب دوستی ہاکی کپ کے فیصلہ کن میچ میں بھارتی پنجاب نے پاک پنجاب کو تین صفر سے شکست دیکر ٹائٹل اپنے نام کیا۔ میچ کے اختتام پر ڈپٹی سپیکر رانا مشہود اور ڈی جی سپورٹ بورڈ عثمان انور نے انعامات تقسیم کئے۔ کبڈی مقابلوں میں بھارت نے پاکستان کو 45-43 سے ہرا کر فائنل میں فتح حاصل کی۔ فٹ بال مقابلوں میں سربیا نے پاکستان گرین کو ایک کے مقابلے میں دو گول سے مات دی۔ بیس بال ایونٹ میں سری لنکا نے افغانستان کو ایک کے مقابلے میں سولہ پوائنٹس سے ہرا دیا۔