شیڈول تبدیل‘ قومی ٹی 20 ٹورنامنٹ 27 نومبر سے شروع ہو گا

لاہور(سپورٹس رپورٹر) پاکستان کرکٹ بورڈ کے زیر اہتمام رواں ماہ کے آخری میں کھیلے جانے والے قومی ٹی ٹونٹی کرکٹ ٹورنامنٹ کے شیڈول میں معمولی تبدیلی کرتے ہوئے ٹورنامنٹ مقررہ دن سے ایک روز قبل شروع ہوگا۔ اس سے قبل ٹورنامنٹ 28 نومبر کو شروع ہونا تھا تاہم بعض وجوہات کی بنا پر اب ٹورنامنٹ 27 نومبر سے راولپنڈی میں شروع ہو گا۔ پاکستان کے مختلف شعبہ جات کے مابین ہونے وا لے ٹورنامنٹ کے انعقاد کے حوالہ سے اجلاس گزشتہ روز پی سی بی ہیڈ کوارٹر قذافی سٹیڈیم میں ہوا جس کی صدارت ڈائریکٹر ڈومیسٹک ذاکر خان نے کی۔ اجلاس کے دوران ٹی ٹونٹی ٹورنامنٹ کے انتظامات کو حتمی شکل دیدی گئی۔ تفصیلات کے مطابق ٹورنامنٹ میں 11 ٹیمیں شرکت کریں گی۔ جنھیں دو گروپ میں تقسیم کیا گیا ہے۔ ٹورنامنٹ میں مجموعی طور پر 28 میچز کھیلے جائیں گے۔ ایونٹ کے سیمی فائنل 2 دسمبر کو جبکہ فائنل 3 دسمبر کو پنڈی سٹیڈیم میں کھیلا جائے گا۔