لاہور (سپورٹس رپورٹر+نمائندہ سپورٹس )پاکستان اور نیوزی لینڈ کے درمیان سیریز کا آخری اور فیصلہ کن میچ بارش کے باعث نتیجہ خیز ثابت نہیں ہوا جس کے باعث سیریز کو 1-1 سے برابر قرار دیا گیا۔دبئی کھیلے گئے میچ میں سرفراز احمد نے ٹاس جیت کر پہلے خود بیٹنگ کا فیصلہ کیا اور اوپنرز نے ایک اچھا آغاز فراہم کیا۔ فخرزمان اور محمد حفیظ نے پہلی وکٹ کی شراکت میں 65 رنز بنائے۔ محمد حفیظ 19 رنز بناکر ہٹ وکٹ آئوٹ ہو گئے۔فخرزمان اور بابر اعظم نے سکور کو 98 رنز تک پہنچایا اور اپنی نصف سنچری بھی بنائی، وہ 23 ویں اوور میں 65 رنز بنا کر گرینڈ ہوم کی گیند پر آوٹ ہوئے۔حارث سہیل اور بابراعظم کی شراکت میں 108 رنز بنے اور اسی دوران دونوں بلے بازوں نے اپنی نصف سنچریاں بھی مکمل کی تاہم حارث سہیل 60 رنز بنا کر فرگوسن کی گیند پر آوٹ ہوئے ۔ شعیب ملک 250 کے مجموعے پر 18 رنز جوڑ کر ہنری کی وکٹ بن گئے۔بابراعظم 8 رنز کے فرق سے سنچری بنانے سے محروم ہو کر نروس نائٹیز کا شکار ہوئے، انہوں نے 100 گیندوں کا سامنا کرتے ہوئے 92 رنز بنائے۔فہیم اشرف 5 اور حسن علی 2 رنز بنا کر آوٹ ہوئے ۔ کپتان سرفراز احمد نے آوٹ ہوئے بغیر 1 رن بنایا۔پاکستان نے 8 وکٹوںپر 279 رنز بنا ئے۔ فرگوسن نے 5 وکٹیں حاصل کیں۔کیوی ٹیم نے ہدف کے آغاز میں ہی اپنے تجربہ کار بلے باز کولن منرو کو کھو دیا تھا جن کو شاہین آفریدی نے صفر آوٹ کردیا تھا۔نیوزی لینڈ نے ساتویں اوور میں ایک وکٹ پر 35 رنز بنائے تھے کہ بارش کے باعث میچ کو روک دیا گیا جو دوبارہ شروع نہ ہوسکا۔امپائرز نے دونوں کپتانوں کو بلایا اور میچ کی صورت حال پر تبادلہ خیال کے بعد میچ ختم کرنے کا اعلان کیا جس کے ساتھ ہی سیریز بھی 1-1 سے برابر ہوگئی اور پاکستان کا 7 برس بعد نیوزی لینڈ کے خلاف سیریز جیتنے کا خواب پورا نہیں ہوسکا۔نیوزی لینڈ نے پہلے میچ میں 47 رنز سے جبکہ دوسرے میچ میں پاکستان نے 6 وکٹوں سے کامیابی حاصل کی تھی پاکستان ٹیم میں اوپننگ بلے باز امام الحق کی جگہ حارث سہیل جبکہ آل راؤنڈر عماد وسیم کی جگہ آصف علی کو شامل کیا گیا تھا۔نیوزی لینڈ کی ٹیم اپنے کپتان کین ولیم سن سے محروم ہوگئی تھی جو انجری کے باعث میچ کا حصہ نہیں بن پائے جبکہ ان کی جگہ ٹام لاتھم نے قیادت کے فرائض نبھائے۔ واضح رہے کہ پاکستان ٹیم گزشتہ 7 سال سے نیوزی لینڈ کے خلاف ون ڈے سیریز جیتنے میں ناکام رہی ہے۔پاکستان ٹیم نے آخری مرتبہ شاہد آفریدی کی قیادت میں فروری 2011 میں نیوزی لینڈ کو ون ڈے سیریز میں شکست سے دوچار کیا تھا۔مذکورہ سیریز کے بعد سے لے کر اب تک پاکستان اور نیوزی لینڈ 4 مرتبہ آمنے سامنے آچکے ہیں اور ہر مرتبہ صرف کیوی ٹیم ہی کامیاب رہی۔