لاہور(سپورٹس رپورٹر) آسٹریلیا پاکستان کو آئی سی سی مینز ٹی ٹونٹی ورلڈ کپ کے دوسرے سیمی فائنل میںپانچ وکٹوں سے شکست دے کر فائنل میں پہنچ گیا ۔دبئی میں کھیلے گئے میچ میں آسٹریلوی کپتان ایرون فنچ نے ٹاس جیت کر فیلڈنگ کا فیصلہ کیا ۔ پاکستان نے مقررہ 20 اوورز میں 4 وکٹوں کے نقصان پر 176 رنز بنائے۔ محمد رضوان 67 اور فخر زمان رنز 55 بناکر نمایاں رہے‘  محمد رضوان اور فخر زمان کے درمیان 72 رنز کی شراکت داری ہوئی۔ محمد آصف اہم میچ میں پہلی ہی گیند پر بغیر کوئی رن بنا کر آؤٹ ہوئے ‘ شعیب ملک بھی نہ چل سکے اور ایک رن بناکر پویلین لوٹ گئے۔بابر اعظم نے 39رنز کی اننگز کھیلی۔مچل سٹارک نے 2 اور پیٹ کمنز اور زمپا نے ایک، ایک وکٹ حاصل کی۔177 رنز کے ہدف کے تعاقب میں آسٹریلیا کا آغاز اچھا نہ رہا اور پہلے ہی اوور میں کپتان ایرون فنچ صفر پر شاہین شاہ کی گیند پر ایل بی ڈبلیو ہو کر پویلین لوٹ گئے۔پہلی وکٹ جلد گرنے کے بعد مچل مارش اور ڈیوڈ وارنر کے درمیان 51 رنزکی شراکت داری قائم ہوئی لیکن جب آسٹریلیا کا مجموعی سکور 52 رنز پر پہنچا تو مچل مارش 22 گیندوں پر 28 رنز بناکر شاداب کی گیند پر کیچ آؤٹ ہوگئے۔ تیسری وکٹ 77 رنز پر گری،سٹیون سمتھ5 رنز بناکر شاداب کا شکار بنے۔ پاکستان کو چوتھی کامیابی 89 رنز پر ملی جب ڈیوڈ وارنر 49 رنز بناکر آؤٹ ہوگئے۔ آسٹریلیا کو پانچواں نقصان 96 رنز پر اْٹھانا پڑا جب گلین میکسویل 7 رنز بناکر آؤٹ ہوئے۔میتھیو ویڈ اور مارکوس سٹونس کی جوڑی نے آسٹریلیا کو فتح دلادی۔کینگروز نے ہدف19اوورز میں پانچ وکٹوں پرپورا کرلیا ۔ میتھیو ویڈچار چھکوں کی مدد سے سترہ گیندوں پر 41اور مارکوس سٹونس اکتیس گیندوں پر40رنز بنا کر ناقابل شکست رہے ۔ شاداب خان نے چار شاہین شاہ آفریدی نے ایک وکٹ حاصل کی ۔میتھیو ویڈ کو میچ کا بہترین کھلاڑی قرار دیا گیا ۔حسن علی نے 4اوورز میں 44رنز دیئے اور کوئی وکٹ حاصل نہ کرسکے ۔ انہوں نے اہم مواقع پر کیچز بھی ڈراپ کئے۔حارث رئوف نے 3اوورز میں 32رنز دیئے ‘کوئی وکٹ حاصل نہ کرسکے ۔عماد وسیم نے تین اوورز میں پچیس ‘شاہین آفریدی نے چار اوورز میں پینتیس ‘محمد حفیظ نے ایک اوور میں تیرہ رنز دیئے۔ گروپ اے کی ٹاپ پوزیشن ہولڈ ر انگلینڈ اور گروپ بی کی پاکستان فائنل میں نہ پہنچ سکیں ۔ پاکستان کی شکست میں آخری اوورز میں سست بیٹنگ اور ڈراپ کیچز نے اہم کردار ادا کیا ۔ حسن علی نے کیچ ڈراپ کرکے میچ ہی گنوا دیا ۔ایونٹ کا فائنل پرسوں آسٹریلیا اور نیوزی لینڈ کے درمیان کھیلا جائیگا۔