لاہور (نمائندہ خصوصی) چیئرمین پی ٹی آئی عمران خان کی سکیورٹی سے متعلق خدشات کے پیش نظر عمران خان کی رہائشگاہ زمان پارک کے اطراف میں سکیورٹی کے سخت انتظامات اور معمول سے ہٹ کر پولیس کی اضافی نفری بھی تعینات کردی گئی۔ اس کے علاوہ کسی بھی غیر متعلقہ گاڑی اور فرد کو عمران خان کی رہائشگاہ جانے پر سختی سے پابندی عائد کی گئی ہے۔ عمران خان کے گھر کی دیوار کے ساتھ سکیورٹی کے پیش نظر ریت کے تھیلوں سمیت سیمنٹ کے بلاکس رکھ کر حفاظتی دیوار قائم کر دی گئی۔ جبکہ پارٹی کی خواتین رہنمائوں کی آمد کے پیش نظر چیکنگ کیلئے خواتین پولیس اہلکاروں کا انتظام بھی کیا گیا ہے۔ اس کے ساتھ سکیورٹی کے مزید کیمرے بھی نصب کر دیئے گئے۔ ذرائع کے مطابق سکیورٹی کے مزید اقدامات لیتے ہوئے زمان پارک کے داخلی و خارجی راستوں پر بھی ریت کے تھیلوں کی چیک پوسٹ بنادی گئی۔ جبکہ خصوصی ڈیسک بھی قائم کی گئی ہے جو آنے جانے والوں کے ریکارڈز رکھیں گے۔ ادھر خیبر پی کے سے پولیس کمانڈوز زمان پارک پہنچ گئے ہیں جہاں وہ عمران خان کی سکیورٹی کے فرائض سرانجام دیں گے۔ کلوز سرکل میں کے پی پولیس کے کمانڈوز کو تعینات کیا جائے گا۔ ایک ٹرک پر 15 سے زائد کمانڈر لاہور پہنچ گئے۔