فلسطینیوں نے اللہ تعالیٰ کی عدالت میں اپنا استغاثہ دائرکردیا :شوکت ورک

 لاہور (نیوز رپورٹر) ڈاکٹر اے کیو خان ہسپتال ٹرسٹ کے بانی و جنرل سیکرٹری ڈاکٹر شوکت بابر ورک نے کہا ہے کہ فلسطینیوں نے اللہ تعالیٰ کی عدالت میں اپنا استغاثہ دائرکردیا۔دنیا کے ڈیڑھ ارب مسلمان روزمحشر اپنے احتساب سے ڈریں اورفلسطینیوں کی بھرپور مدد کیلئے اٹھ کھڑے ہوں کیونکہ ہماری طرف سے انفرادی واجتماعی حیثیت میں فلسطینیوں کی غیبی امداد کی دعاکرنا کافی نہیں۔ دشمنی کرنا تودشمن کی فطرت ہے لیکن مسلمان ملک فلسطینیوں کی مدد کیلئے کیا کررہے ہیں۔ عالم اسلام کی مجرمانہ خاموشی ایک بڑاسوالیہ نشان ہے۔ وہ ڈاکٹر اے کیوخان ہسپتال ٹرسٹ کے زیراہتمام سرورکونین کے حضورہدیہ نعت اورہدیہ درودوسلام پیش کرنے کی پروقار محفل سے خطاب کررہے تھے۔ ٹرسٹی محمدسہیل ،جنرل منیجر ناصرعباس اورنعت خواں ریاض بٹ بھی محفل میں شریک تھے۔ نعت خواں ریاض بٹ نے انتہائی عقیدت اور بے پایاںمحبت کے ساتھ بارگاہ رسالت میں ہدیہ نعت اورمحفل کے اختتام پرہدیہ درودوسلام پیش کیا۔ ڈاکٹر شوکت بابر ورک نے کہا کہ جہاد کادامن چھوڑنے کے نتیجہ میں مسلمانوں کومغلوب اورمعتوب ہونا فطری ہے۔اسلام یقینا امن وسلامتی کاعلمبردار لیکن ظلم وستم سہنا بھی منافقت ہے۔