لاہور(سپورٹس رپورٹر+ نمائندہ سپورٹس) انٹرنیشنل ہینڈ بال فیڈریشن (آئی ایچ ایف) ساوتھ اینڈ سنٹرل ایشیا ہینڈ بال ٹرافی ٹورنامنٹ میں پاکستان کی مینز اور ویمنز ٹیموں نے سیمی فائنل مرحلہ کے لیے کوالیفائی کر لیا ہے۔ ڈھاکہ میں جاری مینز اور ویمنز ایونٹ کے گذشتہ روز آخری لیگ میچ کھیلے گئے۔ مینز ایونٹ میں پاکستان ہینڈ بال ٹیم نے اپنا چوتھا اور آخری گروپ لیگ میچ افغانستان کے خلاف کھیلا جس میں پاکستان ٹیم نے 44-20 گول سے کامیابی اپنے نام کی۔ دوسری جانب ویمنز ایونٹ میں پاکستان ٹیم نے اپنے تیسرے اور آخری گروپ میچ میں پاکستان ویمنز ٹیم نے نیپال کے خلاف سخت مقابلے کے بعد 21-20 گول سے کامیابی حاصل کر کے سیمی فائنل میں جگہ بنائی۔ ٹورنامنٹ کے سیمی فائنل میچز آج کھیلے جائیں گے جن میں پاکستان مینز ٹیم کا مقابلہ میزبان بنگلہ دیش سے جبکہ پاکستان ویمنز ٹیم بھی بنگلہ دیش کے مد مقابل ہوگی۔