اوکاڑہ‘ حب‘ رحیم یار خان (نامہ نگار + ایجنسیاں) مختلف شہروں میں ٹریفک حادثات میں دو بچوں اور خاتون سمیت 9 افراد جاں بحق جبکہ 33 زخمی ہو گئے۔ تفصیلات کے مطابق اوکاڑہ کے قریب بس اور وین کے تصادم میں ایک خاتون اور دو بچے جاں بحق جبکہ دو خواتین اور تین بچوں سمیت 9 افراد زخمی ہو گئے۔ ملتان سے آنے والی بس لاہور سے آنے والی وین سے اوکاڑہ بائی پاس پر ٹکرا گئی جس کے نتیجہ میں ایک خاتون اور دو بچے موقع پر ہی جاں بق ہو گئے۔ ریسکیو نے زخمیوں اور نعشوں کو ڈسٹرکٹ ہیڈکوارٹر ہسپتال منتقل کر دیا جہاں ان کی شناخت کا عمل جاری تھا۔ علاوہ ازیں بلوچستان کے علاقے حب میں دریجی روڈ پر بس الٹنے سے تین زائرین جاں بحق اور 22 زخمی ہو گئے۔ پولیس کے مطابق بس کراچی سے شاہ نورانی جارہی تھی کہ تیزرفتاری کے باعث ویراب کے مقام پر الٹ گئی۔ دوسری جانب خان پور کے علاقے کوئلہ پٹھان میں قومی شاہراہ پر مسافر ویگن درخت سے ٹکرا گئی۔ حادثے میں 3 افراد جاں بحق اور 3 زخمی ہو گئے۔ تمام افراد گوہر خان سے سیہون جا رہے تھے۔ ریسکیو ذرائع کے مطابق نعشوں اور زخمیوں کو تحصیل ہیڈکوارٹر ہسپتال خان پور منتقل کر دیا گیا۔ جاں بحق افراد کا تعلق گوجر خان سے تھا۔