اسلام آباد (سٹاف رپورٹر) پاک بحریہ کے نئے تعینات ہونے والے سربراہ ایڈمرل ظفر محمود عباسی نے گزشتہ روز ائر ہیڈکوارٹرز اسلام آباد کا دورہ کیا۔ ائر ہیڈ کوارٹر اسلام آبادآمد پر پاک فضائیہ کے سربراہ ائرچیف مارشل سہیل امان نے ان کا استقبال کیا۔ انہوں نے پاک فضائیہ کے شہداء کو خراج تحسین پیش کرنے کے لئے یادگار شہداء پر پھولوں کی چادر چڑھائی۔ اس کے بعد پرنسپل سٹاف آفیسرز کا ان سے تعارف کرایا گیا۔ بعد ازاں پاک بحریہ کے سربراہ نے پاک فضائیہ کے سربراہ سے ملاقات کی اور پیشہ ورانہ امور پر تبادلہ خیال کیا۔ ائر چیف نے ایڈمرل ظفر محمود عباسی کو پاک بحریہ کی کمان سنبھالنے پر مبارکباد پیش کی۔ انہوں نے اس امید کا اظہار کیا کہ ایڈمرل ظفر محمودعباسی کی قیادت میں پاک بحریہ مزید ترقی کرے گی۔ ائر چیف نے دونوں افواج کے مابین موجود ہم آہنگی کو مزید بڑھانے اور اسے نئی بلندیوں تک پہنچانے کے عزم کا اعادہ کیا۔