شیخوپورہ: 10 لاکھ تاوان کی 6 سالہ مغویہ چند گھنٹوں میں بازیاب

شیخوپورہ (نامہ نگار خصوصی) سٹی اے ڈویژن پولیس نے 10لاکھ روپے تاوان کیلئے اغوا ہونے والی 6سالہ بچی کو چند گھنٹوں کے اندر ٹریس کرکے بازیاب کرا لیا۔ چار ملزموں انیس، سفیان، ذیشان اور سلیمان کو گرفتار کرکے 10لاکھ روپے کی رقم بھی برآمد کر لی۔ تفصیلات کے مطابق محلہ بستی بلوچاں میں 6 سالہ بچی نینسی کو ان کے قریبی عزیزوں نے اغوا کیا اور بچی کی والدہ کو واٹس اپ کال کرکے 10لاکھ روپے تاوان کا مطالبہ کیا۔ بچی کی والدہ نے تھانہ سٹی اے ڈویژن کو اطلاع دی۔ پولیس نے لوکیشن ٹریس کی اور بچی کی والدہ کو 10لاکھ کی رقم دے کر موقع پر روانہ کیا تو اس دوران پولیس نے موضع بھکھی کے مختلف علاقوں میں سفید کپڑوں میں ناکہ بندی کرلی اور جب ملزمان نے پیسے وصول کیے تو پولیس نے انہیں گھیر کر موقع پر ہی پکڑ لیا اور بچی کو باحفاظت برآمد کرنے کے بعد لواحقین کے حوالے کردیا۔ ملزمان بچی کے قریبی عزیز ہیں۔ بچی کو اغوا کر کے فیصل آباد روڈ کی آبادی بھکھی میں رکھا ہوا تھا۔