حضورؐ رحمۃ للعالمین، سیرت طیبہ انسانیت کیلئے مشعل راہ: عبدالخبیر آزاد 

لاہور (خصوصی نامہ نگار) چیئرمین مرکزی رؤیت ہلال کمیٹی مولانا سید محمد عبدالخبیر آزاد نے بادشاہی مسجد میں جمعہ کے اجتماع سے خطاب کرتے ہوئے کہ اللہ تعالیٰ نے حضور نبی کریمؐ کو رحمۃ للعالمین بناکر بھیجا۔ امام الانبیاء  حضرت محمد مصطفی ﷺ کی سیرت طیبہ پوری کائنات انسانی کیلئے مشعل راہ ہے۔ دنیا کی تمام مشکلات کا حل سیرت نبوی کی پیروی میں ہے۔ اللہ تعالیٰ نے دعوت و تبلیغ کا کام حضرت محمد ﷺ  کے ذریعے پوری دنیا تک پہنچایا۔ دعوت الی اللہ تمام انبیاء کا مشن ہے کہ مخلوق خدا کا تعلق اپنے خالق حقیقی کے ساتھ جوڑیں۔ انہوں نے کہا کہ سعودی عرب کے تجارتی وفد کے پاکستان آنے سے ملکی معیشت مضبوط و مستحکم ہوگی۔ سعودی سرمایہ کاری سے ترقی و خوشحالی کا نیا باب کھلے گا۔ سعودی عرب کے فرمانروا خادم الحرمین شریفین سلمان بن عبدالعزیز اور ولی العہد محمد بن سلمان نے ہر مشکل گھڑی میں پاکستان کا ساتھ دیا۔ وزیر اعظم شہباز شریف اور آرمی چیف کی دنیا بھر میں پاکستان کیلئے سرمایہ کاری کی کوششیں رنگ لے آئیں۔ ڈاکٹر ذاکر نائیک کے لاہور آمد پر ہم ان کو خوش آمدید کہتے ہیں۔