بچیوں کے عالمی دن پر زیور تعلیم پروگرام رجسٹریشن ، رقم کی شفاف منتقلی کیلئے تقریب 

لاہور(نیوز رپورٹر) پنجاب سوشل پروٹیکش اتھارٹی کی وائس چیئرپرسن جہاں آرا ء منظور و ٹو نے بچیوں کے عالمی دن کے موقع پر زیور تعلیم پروگرام کے تحت رجسٹریشن اور رقم کی شفاف منتقلی کیلئے تقریب میں مہمان ِ خصوصی کے طور پر شرکت کی اور آگاہی مہم کا افتتاح گورنمنٹ گرلز ہائی سکول، ہاجی فرید روڈ، قصور میں کیا۔ سی ای او ایجوکیشن محمد انور ندیم نے جہاں آرا وٹو کاپر تپاک استقبال کیا۔ تقریب میں ایڈیشنل ڈپٹی کمشنر عمر اویس ، یو این ویمن پنجاب کی ہیڈ سدرہ ہمایوں PMIU، محکمہ سکول ایجوکیشن کی نمائندہ زروا وقار اور دیگر ضلعی افسران نے شرکت کی۔ حکومت پنجاب کی طرف سے 2 ہفتے کی اس آگاہی مہم کا مقصد کم شرہ خواندگی کے حامل 17 اضلاع کے سرکاری سکولوں میں چھٹی سے دسویں جماعت تک پڑھنے والی زیادہ سے زیادہ طالبات کو 80فیصد حاضری برقرار رکھنے پر سہ ماہی بنیادوں پر3000روپے کے وظائف دینا ہے۔ اس مہم کے دوران 206 سکولوں میں کیمپ لگائے گئے ہیں جن میں 2 ہفتے تک طالبات کی رجسٹریشن اور پہلے سے رجسٹر طالبات کے والدین کو شفاف طریقے سے بینک آف پنجاب کے نمائندگان کے ذریعے رقم فراہم کی جائے گی۔ جہاں آرا وٹو نے کہا بچیوں کی تعلیم کی راہ میں حائل رکاوٹوں کو دور کرنے کیلئے یہ پروگرام ترتیب دیا گیا ہے۔ اس مہم کو کامیاب بنانے کیلئے ہر  کیمپ کے ملحقہ علاقوں میں جا کر اس بات کو یقینی بنائیں کہ ہر رجسٹرڈ اور اہل طالبہ کے والدین رقم کی وصولی کیلئے سکول میں موجود  کیمپ میں آئیں ۔