کراچی (این این آئی) فاسٹ باﺅلرسہیل تنویر ہمپشائر کاونٹی سے کامیاب انگلش سیزن کھیلنے کے بعد وطن واپس پہنچ گئے۔ وہ رواں ماہ بھارت میں چیمپئنز لیگ کے مین راﺅنڈ میں اپنی کاونٹی کی نمائندگی کریں گے۔ایک انٹرویو میں سہیل تنویر نے کہا کہ انگلش سیزن کے دوران مجھے پاکستانی ٹیم کے ساتھ ویسٹ انڈیز اور زمبابوے کے دورے کرنا پڑے تاہم کاونٹی حکام میری مجموعی کارکردگی سے خوش ہیں۔ سہیل تنویر نے ویسٹ انڈیز اور زمبابوے کے دوروں میں 2-2 ٹی ٹوئنٹی میچوں میں حصہ لیا۔ انہوں نے کہا کہ میری خواہش ہے کہ مجھے ون ڈے ٹیم میں بھی جگہ ملے۔ ون ڈے اسکواڈ میں جگہ بنانے کےلئے بھرپور کوشش کر رہا ہوں۔