واپڈا نے آل پاکستان بیڈمنٹن ٹورنامنٹ جیت لیا

لاہور (سپورٹس رپورٹر) آل پاکستان عامر حیات روکڑی رینکنگ بیڈمنٹن ٹورنامنٹ 2013ءکے مینز اور ویمنز کا ٹیم ایونٹ پاکستان واپڈا نے جیت لیا ہے۔ لاہور میں جاری ٹورنامنٹ میں مینز ٹیم ایونٹ کے فائنل میں واپڈا نے خیبر پی کے کو تین صفر سے جبکہ ویمنز ٹیم ایونٹ میں واپڈا نے پنجاب کے خلاف تین صفر سے کامیابی حاصل کی۔ ٹورنامنٹ میں سنگلز کے مقابلوں کا بھی آغاز ہو گیا جس میں پلواشہ بشیر، سارہ مہمند، سائرہ رزاق، سعدیہ ارشد، صائمہ وقاص، خضرا رشید، فرزانہ علی اور محور شہزاد نے ویمنز کے کوارٹر فائنل کے لئے کوالیفائی کر لیا ہے۔ ویمنز ڈبلز میں پلواشہ بشیر اور سارہ مہمند نے، سائرہ رزاق اور خضرا رشید نے، سمیرا ارشد اور انیلا ارشد نے، عزالہ اور محور نے، محمونہ اور صبا مغل نے، صائمہ وقاص اور فرزانہ علی نے، مینال طارق اور جویریہ طاہر نے جبکہ سعدیہ ارشد اور انیقہ رانا نے پری کوارٹر فائنل میں حریف کھلاڑیوں کو شکست سے دوچار کیا۔ گذشتہ روز مینز سنگلز کا بھی پہلا راونڈ منعقد ہوا جس میں انجم بشیر، عزیر، عتیق چوہدری، عدنان عزیز، صابر حنیف، اعجاز مالا، راجہ حسنین، ظفر تسنیم، احمد فیضان، عرفان سعید، عثمان رضا، کاشف سلہری، اعظیم سرور، مراد علی، عامر سعید، علی یار بیگ، صابر حسین، سبحان جمیل نے اپنے اپنے حریف کھلاڑیوں کو شکست سے دوچار کیا جبکہ شفیق چوہدری کو واک اوور دیا گیا۔