لاہور (نمائندہ سپورٹس+سپورٹس رپورٹر )پاکستان کرکٹ بورڈ نے کرکٹ کمیٹی کے چیئرمین کیلئے ناموں پر غور شروع کر دیا، پی سی بی آئندہ ہفتے چیئرمین کرکٹ کمیٹی کا اعلان کر سکتا ہے۔پی سی بی نے کرکٹ کمیٹی کے چیئرمین کیلئے ناموں پر غور شروع کر دیا ، اقبال قاسم کے مستعفی ہونے کے بعد چیئرمین کا عہدہ خالی ہے، ذرائع کا کہنا ہے کہ چیئرمین کے عہدے کیلئے ظہیر عباس ، انتخاب عالم اور سلیم یوسف کا نام بھی 8 سے زیادہ مجوزہ کرکٹرز کی فہرست میں شامل ہے ۔پاکستان کرکٹ بورڈ ان کرکٹرز کے علاوہ بھی کئی نام زیرغور لا رہا ہے جبکہ پی سی بی آئندہ ہفتے چیئرمین کرکٹ کمیٹی کا اعلان کر سکتا ہے کیونکہ پی سی بی 30 ستمبر کو نیشنل ٹی ٹونٹی کے آغاز سے قبل کمیٹی کا اجلاس بلاناچاہتا ہے۔کرکٹ کمیٹی کے اجلاس میں پاکستان ٹیم کی دورہ انگلینڈ اور ہیڈکوچ چیف سلیکٹر مصباح الحق کی کارکردگی پر بات ہو گی ،کمیٹی کے اجلاس میں مصباح الحق کو بھی بلایا جائے گا۔ذرائع کے مطابق کمیٹی کے ایک رکن آئی سی سی میچ ریفری کیلئے نام بھجوانے کیلئے کوشاں ہیں ، میچ ریفری بننے کی صورت میں رکن کو کمیٹی سے الگ ہونا پڑیگا اور رکن کے الگ ہونے کی صورت میں نئے رکن کی نامزدگی بھی پی سی بی کو کرنا ہو گی۔