جمرود : معمولی تنازعہ پرمیچ کے حریفوں میں فائرنگ‘ فٹبالر سمیت 2افرادقتل

لاہور(نمائندہ سپورٹس+سپورٹس رپورٹر) صوبہ خیبر پی کے کے ضلع جمرود میں دوستانہ میچ کے دوران حریفوں کی آپس میں لڑائی کے نتیجے میں ایک نوجوان فٹ بالر سمیت دو افراد ہلاک ہوگئے۔جمرود کے ٹیڈی بازار میں میچ کے دوران جھڑپ شروع ہوگئی تھی جس کے نتیجے میں اس علاقے کے ٹاپ فٹ بالر جنید اور ایک اور شخص ہلاک ہوگیا تھا، اس واقعے میں جنید کا بھائی بھی زخمی ہوا تھا۔علاقے کے ایس ایچ او مسلم خان کے مطابق یہ میچ ٹیڈی بازار قبیلے کے دو نوجوانوں شیر خان خیل اور مانیا خیل کے مابین جاری تھا جب معمولی تنازعہ کی وجہ سے ایک دوسرے پر فائرنگ شروع ہوگئی۔ فائرنگ کے نتیجے میں ٹاپ فٹ بالر جنید ولد مختیار شیر خان جاں بحق اور اس کے بھائی شعیب اور ایک اور لڑکا کلیم زخمی ہوگئے جنہیں علاج کیلئے مقامی ہسپتال منتقل کیا گیا تاہم کلیم ہسپتال میں دم توڑ گیا۔ واقعے کے بعد پولیس موقع پر پہنچی اور صورتحال کو قابو میں کیا اور تفتیش شروع کردی۔