اسلام آباد(اے پی پی) آزاد کشمیر کی قیادت نے قائداعظم محمد علی جناح ؒ کے کشمیر کے حوالے سے ویژن کو تاریخی قرار دیتے ہوئے کہا ہے کہ قائد پاکستان کے لئے کشمیر کے سیاسی، اقتصادی، مذہبی اور جغرافیائی اعتبار سے اہمیت سے بخوبی آگاہ تھے یہی وجہ ہے کہ انہوں نے کشمیر کو پاکستان کی شہہ رگ قرار دیا تھا،کشمیری آج بھی تحریک آزادی کو اپنے خون سے زندہ وجاوید رکھے ہوئے ہیں اور قائد کے نظریہ پر عمل پیرا ہیں۔ جمعہ کووزیراعظم آزاد کشمیر راجہ فاروق حیدر خان نے بانی پاکستان قائداعظم محمد علی جناح کی برسی پر اپنے پیغام میں کہا کہ کشمیریوں نے قائداعظم کی قیادت میں اپنی نظریاتی وابستگی مملکت پاکستان کے ساتھ قائم کی تھی۔ وزیراعظم آزادکشمیرنے کہاکہ پاکستان کے ساتھ کشمیریوں کی وابستگی رہتی دنیا تک قائم رہے گی۔