کلثوم نواز کی آمریت کےخلاف بہادری‘جدوجہد تاریخ کا ناقابل فراموش باب : شہباز شریف

لاہور( این این آئی)سابق وزیراعظم و پاکستان مسلم لیگ(ن) کے صدر شہباز شریف نے بیگم کلثوم نواز کی پانچویں برسی پر خراج عقیدت پیش کرتے ہوئے کہا ہے کہ بڑی بہنوں کی طرح بھابھی بیگم کلثوم نواز ہماری دعاﺅں اور یادوں میں زندہ ہیں اور ہمیشہ زندہ رہیں گے ۔اپنے بیان میں میں انہوں نے کہا کہ آمریت کے خلاف ان کی بہادری، سیاسی بصیرت اور جدوجہد تاریخ کا ایک ناقابل فراموش باب ہے ،بیگم کلثوم نواز نے مشکل کی گھڑی میں سیاسی میدان میں قدم رکھا اور ایسا شاندار کردار نبھایا جسے کبھی فراموش نہیں کیا جاسکتا ،سیاسی کارکنوں کے لئے وہ ایک شفیق والدہ کی طرح تھیں، وہ سراپا خیرخواہی اور دانائی تھیں ۔ انہوںنے کہا کہ علم وادب سے انہیں خصوصی محبت تھی، اسلام، قرآن اور مشرقی روایات ہی ان کی پہچان تھی،ذاتی حوالے سے بڑی بہن کے طور پر ان کی شفقت، رہنمائی اور مخلصانہ مشورے میرا قیمتی اثاثہ ہے ،افسوس دنیا سے رخصت ہوتے وقت ان کے پیاروں کو ان سے دور کردیا گیا تھا ،یہ غم ہم بطور خاندان کبھی بھلا نہیں سکتے ،اللہ تعالی ان کے درجات بلند فرمائے، اہل خانہ اور تمام وابستگان کو صبر جمیل دے۔