لاہور(سپورٹس رپورٹر) پاکستان کرکٹ بورڈ کے زیر اہتمام چیمپئنز ون ڈے کپ آج سے اقبال سٹیڈیم فیصل آباد میں شروع ہوگا۔ ٹرافی کی رونمائی کی گئی۔تقریب میں ٹورنامنٹ کی پانچوں ٹیموں کے کپتان شاداب خان، محمد رضوان، محمد حارث، شاہین شاہ آفریدی، سعود شکیل سمیت ٹیموں کے مینٹورز نے بھی ٹرافی کیساتھ فوٹو سیشن کروایا۔ چیمپیئنز ون ڈے کپ 2024 میں شامل کپتانوں اور مینٹورز نے پری ٹورنامنٹ پریس کانفرنس کی۔ سرفراز احمد ، ثقلین مشتاق اور مصباح الحق نے کہا کہ ٹورنامنٹ میں اچھی کرکٹ دیکھنے کو ملے گی، ٹورنامنٹ کے آغاز کا بے صبری سے انتظار ہے، طویل عرصہ سے پلیئرز کا ڈومیسٹک کرکٹ کا مسئلہ ہے، ٹورنامنٹ میں کھلاڑیوں کی خامیاں دور کرینگے۔وقار یونس نے کہا کہ پہلا موقع ہے کہ ڈومیسٹک کرکٹ کو اتنا اہم ٹورنامنٹ ملا ہے، سب کی ذمہ داری ہے کہ مشکلات کا خاتمہ کیا جائے، ٹورنامنٹ کیلئے 150 کھلاڑیوں کا انتخاب کیا گیا ہے، جب تک ڈومیسٹک کرکٹ اچھی نہیں ہوگی تب تک انٹرنیشنل کرکٹ بہتر نہیں ہوگی۔ شعیب ملک نے کہا کہ ہمارے کرکٹر کو پروفیشنلزم، فٹنس اور گیم کو جاننے کے مسائل ہیں، اس ٹورنامنٹ میں تمام مسائل حل کرنے کی کوشش کریں گے۔ انٹرنیشنل کرکٹ کیلئے ضروری ہے کہ ملک میں بھی اس وقت اسی فارمیٹ کی کرکٹ کھیلی جا رہی ہو، ہمیں ہوم سیریز کیلئے کنڈیشنز اپنے مطابق بنانا پڑیں گی۔