لندن کے سٹیمفورڈ برج سٹیڈیم میں کھیلے جانے والے میچ میں یک طرفہ مقابلے کی توقع کی جا رہی ہے۔ چیلسی نےاس سے پہلے اوے لیگ (Leg) میں بولٹن کو چار صفر کی شکست سے دوچار کیا تھا۔ چیلسی کی ٹیم اس وقت پوائنٹس ٹیبل پر چوہتر پوائنٹس کے ساتھ پہلے نمبر پر موجود ہے اور آج کے میچ میں کامیابی کی صورت میں اسے دوسرے نمبر پر موجود مانچسٹر یونائٹیڈ کے خلاف چار پوائنٹس کی برتری حاصل ہو جائے گی۔ چیلسی کے مینیجر کارلوس اینسیلوٹی کا کہنا ہے کہ ان کی ٹیم بولٹن کے خلاف میچ کو آسان نہیں لے گی اور اگلے تمام میچوں میں کامیابی حاصل کر کے لیگ ٹائٹل جیتنے کی کوشش کرے گی۔ چیلسی کی ٹیم میں مائیکل بیلیک اور سولومن کالو فٹ ہو کر واپس آ چکے ہیں، جبکہ نکولس انیلکا کو سٹرائیکر ڈیڈئیر ڈرگبا کی جگہ ٹیم میں شامل کیا جائے گا۔