عمران خان سیاسی افق پر چمک رہے ہیں: عثمان بزدار 

لاہور (نیوز رپورٹر)   وزیراعلیٰ پنجاب سردار عثمان بزدار نے کہا ہے کہ چیئرمین تحریک انصاف عمران خان سیاسی افق پر روشن ستار ے کی مانند چمک رہے ہیں۔عمران خان نے قوم کی صحیح سمت رہنمائی کی اور خودداری کی راہ پر چلنا سکھایا۔انہوں نے عوام کو سیاسی شعور دیا اور جذبہ حب الوطنی بیدار کیا۔ عمران خان نے قوم کے جذبات کی حقیقی ترجمانی کی۔ وزیراعلیٰ عثمان بزدار نے کہا کہ عمران خان نے ملک میں اصولو ںکی سیاست کو فروغ دیا۔ کپتان نے قوم کو اقبالؒ کے افکار اور قائداعظمؒ کے زریں اصولوں پر چلنا سکھایا اور عالمی سطح پر ملک و قوم کا وقار بلند کیا۔ انہوں نے کہا کہ عمران خان ایماندار و دیانتدار لیڈر ہیں اور کوئی مائی کا لعل ان کا مقابلہ نہیں کر سکتا۔علاوہ ازیں وزیراعلیٰ پنجاب عثمان بزدار نے ڈیرہ اسماعیل خان اور کرک میں پولیس موبائل وینز پر حملوں کی مذمت کی ہے۔ وزیراعلیٰ عثمان بزدار نے حملوں میں شہید پولیس اہلکاروں کی قربانیوں کو خراج عقیدت پیش کیا ہے اور  شہید اہلکاروں کے اہل خانہ سے دلی ہمدردی و اظہار تعزیت کیا ہے۔