ملک بھر میں عید الفطر مذہبی عقیدت و احترام کے ساتھ منائی گئی

 اسلام آباد+دہلی+ڈھاکہ(آئی این پی+این این آئی)ملک بھر میں عید الفطر مذہبی عقیدت و احترام کے ساتھ منائی گئی۔ ملک کے چھوٹے بڑے شہروں میں نماز عید کے ہزاروں چھوٹے بڑے اجتماعات ہوئے جس میں امت مسلمہ اور ملک کی سلامتی، ترقی اور خوشحا لی کیلئے دعائیں مانگی گئیں۔نماز کے بعد لوگوں نے ایک دوسرے کو عید کی مبارکباد دی۔میٹھی عید پر شیر خرمے، کھیر، مٹھائیوں، کیک اور دیگر لوازمات سے مہمانوں کی تواضع کی گئی۔بچے عیدی بٹورنے اور عیدی اڑانے میں مصروف ہیں تو وہیں شام کے بعد شہریوں کی بڑی تعداد تفریحی مقامات پر پہنچی اور عید کا مزہ دوبالا کیا۔صدر آصف زرداری، وزیراعظم شہباز شریف اور افواج پاکستان کے سربراہان کی جانب سے قوم کو عیدالفطر کی مبارکباد پیش کی گئی۔صدر نے اپنے پیغام میں کہا کہ خوشی کے اس موقع پر مقبوضہ کشمیر کے عوام کو بھی نہیں بھولنا چاہیے۔فلسطینی عوام کے ساتھ یکجہتی کا اظہار کرتے ہوئے  انہوں نے کہا کہ عالمی برادری غزہ میں فوری امن اور امداد کی فراہمی کو یقینی بنائے۔وزیراعظم شہباز شریف نے اپنے پیغام میں کہاکہ عید معاشی طور پر کمزور بہن بھائیوں کو ان کی خوشیاں دوبالا کرنے میں مدد کرنے کا نام ہے۔انہوں نے کہا کہ صاحبِ ثروت افراد ضرورت مندوں کو خوشیوں میں شامل کریں اور ملک کیلئے اپنی جانوں کے نذرانے پیش کرنے والے بیٹوں کو خراجِ عقیدت۔آئی ایس پی آر کے مطابق چیئرمین جوائنٹ چیفس آف اسٹاف، سروسز چیفس نے قوم کو عید کی مبارک باد دی ہے۔مسلح افواج نے عید کے پرمسرت موقع پر قوم کے نام پیغام جاری کرتے ہوئے کہا کہ سپاہی کیلئے عید کا اصل جوہر فرنٹ لائن پر قوم کی حفاظت میں مضمر ہے، اللہ تعالی وطن پر اپنی رحمتیں نازل فرمائے، امن اور خوشحالی لائے۔آئی ایس پی آر کے مطابق اپنے پیغام میں پاک فوج کے سربراہن نے کہا کہ اس پر مسرت موقع پر آئیے اپنے قومی ہیروز کے غیر متزلزل حوصلے کو یاد رکھیں، یہ ہیرو پاکستان کی مسلح افواج اور قوم کیلئے مشعل راہ ہیں، ہم ان بہادروں اور ان کے اہل خانہ کی قربانیوں کیلئے ہمیشہ شکر گزار ہیں۔پڑوسی ملک بھارت اور بنگلہ دیش میں عید الفطر مذہبی عقیدت و احترام سے منائی گئی۔بنگلہ دیش کے تمام چھوٹے بڑے شہروں اور قصبوں کی جامع مساجد، عیدگاہوں اور کھلے مقامات پر عید الفطر کی نماز کے اجتماعات منعقد کیے گئے۔دوسری جانب بھارت میں بھی بسنے والے مسلمانوں کی جانب سے عید کی نماز کے اجتماعات کا انعقاد کیا گیا۔نماز عید کے بعد ملک کی سلامتی، ترقی اور خوشحالی کی خصوصی دعائیں مانگیں جس کے بعد لوگوں نے ایک دوسرے سے گلے مل کر باہمی رنجشوں کو بھلا کو عید سعید کی مبارک باد پیش کی۔