آئندہ سال چیمپئنز ٹرافی کے بعد قومی ٹیم کا دورہ نیوزی لینڈ شیڈول

لاہور(سپورٹس رپورٹر)پاکستان کرکٹ ٹیم آئندہ سال آئندہ سال چیمپئنز ٹرافی کے بعد نیوزی لینڈ کا دورہ کریگی۔پاکستان کرکٹ بورڈ اور نیوزی لینڈ کرکٹ کے درمیان پاکستان کرکٹ ٹیم کے دورہ نیوزی لینڈ میں ردو بدل کے حوالے سے بات چیت جاری ہے۔پی سی بی اور نیوزی لینڈ نے باہمی رضا مندی سے پاکستانی ٹیم کے دورہ نیوزی لینڈ کو آئندہ برس کے اوائل میں رکھا ہے۔ پی سی بی اور نیوزی لینڈ کرکٹ کے درمیان وائٹ بال سیریز کیلئے بات چیت جاری ہے کیونکہ ایف ٹی پی کے مطابق نیوزی لینڈ نے آئندہ برس کے اوائل میں پاکستان کی میزبانی کرنی ہے لیکن چیمپئنز ٹرافی سے قبل جنوری فروری میں پی سی بی نے سہ فریقی سیریز کا انعقاد کرنا ہے۔سہ فریقی سیریز کی وجہ سے اب پاکستان ٹیم چیمپئنز ٹرافی کے بعد نیوزی لینڈ کا دورہ کریگی، نیوزی لینڈ کرکٹ نے تصدیق کی ہے کہ چند ہفتوں میں معاملات طے ہو جائیں گے۔پاکستان کے دورے میں 3ون ڈے اور 3ٹی 20میچز کی سیریز شامل ہے جبکہ سہ فریقی سیریز کیلئے دو ٹیموں نیوزی لینڈ اور جنوبی افریقہ نے تصدیق کی ہوئی ہے۔