لاہور(سپورٹس رپورٹر)رواں ماہ پاکستان کا دورہ کرنے والی نیوزی لینڈ کرکٹ ٹیم کو ٹی ٹونٹی سیریز سے قبل بڑا دھچکا، فن ایلن ا ور ایڈم ملنے انجری کا شکار ہوکر پاکستان کے خلاف سیریز سے باہر ہوگئے۔نیوزی لینڈ کرکٹ بورڈ کے مطابق دونوں کیوی کھلاڑی ٹریننگ کے دوران انجری کا شکار ہوئے۔ انجری کی نوعیت کا اندازہ لگانے کے بعد دونوں کھلاڑیوں کو پاکستان کیخلاف سیریز سے باہر کردیا گیا۔نیوزی لینڈ کرکٹ نے بتایا کہ ایڈم ملنے ٹخنے کی انجری کا شکار ہوئے ہیں جن کی جگہ وکٹ کیپر بیٹر ٹام بلنڈل کو شامل کیا جائیگا۔ فن ایلن کی جگہ آل راؤنڈر زیک فاولکس نیوزی لینڈ ٹیم کے ہمراہ پاکستان آئیں گے۔نیوزی لینڈ ٹیم کے کوچ گیری سٹیڈ کا کہنا تھا کہ روانگی سے قبل اہم کھلاڑیوں کا انجرڈ ہونا بدقسمتی ہے۔ دونوں کرکٹرز گزشتہ ورلڈ کپ سے ہمارے لیے ٹی ٹونٹی میں اچھے پرفارمرز رہے ہیں۔ نیوزی لینڈ کرکٹ ٹیم کے کپتان کین ولیمسن سمیت مچل سینٹنر، ڈیون کانوے، لوکی فرگوسن، گلین فلپس اور میٹ ہنری ‘ ٹرینٹ بولٹ، ریچن رویندرا ڈیرل مچل آئی پی ایل کی وجہ سے پاکستان نہیں آئیں گے۔ پاکستان اور نیوزی لینڈ کی ٹیموں کے درمیان پہلا ٹی ٹونٹی میچ 18 اپریل کو پنڈی سٹیڈیم میں کھیلا جائیگا۔مہمان ٹیم کل پاکستان پہنچے گی ۔