یو بی جی نے کاروباری برادری کو ایک چھتری تلے جمع کیا ،ایس ایم منیر

لاہور(کامرس ڈیسک)یونائٹیڈ بزنس گروپ کے سرپرست اعلیٰ،ایف پی سی سی آئی کے سابق صدر ایس ایم منیر نے کہا ہے کہ یو بی جی کی قیادت نے اپنے کردار اور اپنے کام سے ملک بھر کی بزنس کمیونٹی کے دل جیتے ہیں اور انہیں ایک چھتری تلے جمع کیا ہے، ہم زبیرطفیل کی صدارت میں یو بی جی کی پوری ٹیم کے ساتھ ملکر گروپ کے تن آوردرخت کو مزیدمضبوط بنائیںگے، یونائٹیڈ بزنس گروپ  سے منتخب عہدیداران نے  5سال تک ایف پی سی سی آئی کو ایک مضبوط ادارہ بنایا اوربزنس کمیونٹی کا یو بی جی کے لیڈران پر اعتماد مزید مضبوط ہوا ہے کیونکہ ہم پورے پاکستان کے تاجر نمائندوں کو ساتھ لے کر چل رہے ہیں، ہماری جدوجہدکا مقصد بزنس کمیونٹی کو مضبوط بنانا ہے۔ انہوں نے ان خیالات کا اظہارآر سی سی آئی کے گروپ لیڈر سہیل الطاف کی قیادت میں ملاقات کیلئے آنے والے وفد سے گفتگو کے دوران کیا۔ملاقات میں یو بی جی کے مرکزی ترجمان گلزارفیروز، وفد کے اراکین امان اللہ خان،ڈاکٹر حسن سروش ،سید اسد مشہدی، راجہ عامراقبال، زاہد لطیف خان اورعالمی شہرت یافتہ ایگزی بیشن ایکسپرٹ خورشید برلاس بھی موجود تھے۔ ایس ایم منیر نے کہا کہ ملک کی معیشت کی بہتری کے آثار نمایاں حد تک سامنے آنا شروع ہوچکے ہیں۔ پاکستان کی برآمدات میں تیزی آنا شروع ہوچکی ہے جو ملک کی ترقی وخوشحالی کیلئے نیک فال ہے ،آئندہ چند سالوں میں پاکستان ایک مضبوط سیاسی اور معاشی قوت بن کر ابھرے گا۔انہوں نے کہا کہ ہمیں بحیثیت قوم اپنی آرمی کے جوانوں اورآرمی چیف جنرل قمر جاوید باجوہ(نشان امتیاز) پر فخر ہے،افواج پاکستان ملک کی جغرافیائی سرحدوں کی حفاظت کے ساتھ ساتھ معاشی طور پر بھی نامساعد حالات کے باوجود وزیراعظم عمران خان اورآرمی چیف جنرل قمر جاوید باجوہ(نشان امتیاز)ملک میں ترقی کے عمل کو تیزی سے آگے بڑھا رہے ہیں، پاکستان میں ملٹری کا کردار دوسرے اداروں سے ہمیشہ سے ہی اہم رہا ہے،پاک فوج کے جوانوں نے سرحدوں پر مخالف قوتوں سے نبرد آزما ہوکر ہمیں تحفظ فراہم کیا، ہم پاکستان آرمی کے بہادر جوانوں کی وجہ سے ہی سکون کا سانس لے رہے ہیں اور،پاکستان آرمی کی جدوجہد کو سلام کرتے ہیں جنہوں نے ہماری جانوں کی حفاظت کیلئے اپنی جانیں قربان کیں۔اس موقع پر گروپ لیڈر آر سی سی آئی نے یو بی جی کے سرپرست اعلیٰ ایس ایم منیر،چیئرمین افتخار علی ملک،صدر زبیرطفیل،جنرل سیکریٹری ظفر بختاوری،سینئربزنس لیڈر ریاض الدین شیخ سمیت تمام یو بی جی لیڈران کوخراج تحسین پیش کرتے ہوئے کہا کہ آئندہ ایف پی سی سی آئی الیکشن میں یونائٹیڈ بزنس گروپ بھرپور کامیابی حاصل کرے گا،یو بی جی کا اسلام آباد میں قائم کردہ سیکریٹریٹ ظفربختاوری کی سربراہی میں بھرپور رابطہ مہم جاری رکھے ہوئے ہے ۔