اداکارہ دردانہ بٹ کے انتقال پر متعدد شوبز شخصیات نے تعزیتی پیغامات جاری کئے ہیں،اداکارہ بشری انصاری نے اپنے پیغام میں کہا کہ دردانہ بٹ ایک باہمت خاتون تھیں اور انہوں نے زندگی میں بہت سی مشکلات دیکھیں لیکن وہ مشکلات ان کے چہرے کی مسکراہٹ ختم نہیں کر سکیں ، اللہ پاک ان کے درجات بلند فرمائے۔ اداکارہ عائشہ عمر نے کہا کہ وہ جب بھی دردانہ بٹ سے ملیں انہیں ہمیشہ مسکراتے ہوئے پایا، انہوں نے کہا کہ وہ ہمارے دلوں میں ہمیشہ زندہ رہیں گی، اللہ پاک ان کو اپنے جوار رحمت میں جگہ عطافرمائے۔ عائشہ عمر نے مداحوں سے بھی ماسک پہننے اور ویکسین لگوانے کی اپیل کی۔ اداکارہ علیزے شاہ نے کہا کہ وہ وہ دن کبھی نہیں بھول سکتیں جب ان کی ملاقات دردانہ بٹ سےہوئی اور انہوں نے انہیں کہا کہ دنیا بہت ظالم ہے اپنا خیال رکھا کرو۔ انہوں نے کہا کہ انہیں یہ نہیں معلوم تھا کہ یہ ان کی پہلی اور آخری ملاقات ہو گی۔ علیزے شاہ نے دردانہ بٹ کے ایصال ثواب کے لیے دعا بھی کی۔اس کے علاوہ فاطمہ آفندی، غنا علی، محسن عباس حیدر، عمیر جسوال، کنور علی نفیس، نوید رضا ، عمیر رانا، عاصم محمود، احمد علی بٹ، نبیل ظفر، جویریہ سعود، سیمی راحیل، شگفتہ اعجاز، نور بخاری، انجلین ملک اور نعمان حبیب نے بھی تعزیتی پیغاما ت جاری کیے۔