نائیجریاسے عمرہ زائرین کا پہلا کارواں سعودی عرب پہنچ گیا

بیرون مملکت سے عمرہ زائرین کا پہلا کارواں سعودی عرب پہنچ گیا،میڈیارپورٹس کے مطابق اس امر کا اعلان حج، عمرہ و زیارت کی قومی کمیٹی کے رکن ھانی العمیری نے خصوصی گفتگو کرتے ہوئے کیا،ھانی العمیری نے بتایا کہ جمعہ کو نائجیریا سے عمرہ زائرین کا پہلا کارواں جدہ کے کنگ عبدالعزیز انٹرنیشنل ایئرپورٹ پرپہنچا،انہوں نے بتایا کہ عمرہ کمپنیوں اور اداروں نے بیرون مملکت سے آنے والے عمرہ زائرین کو رہائش، کھانے پینے اور ٹرانسپورٹ کی سہولتیں فراہم کرنے کی تمام تیاریاں پہلے سے ہی کر رکھی تھیں،ایئرپورٹ سے لے کر ہوٹلوں اور پھر وہاں سے مسجد الحرام پہنچانے اور لانے تک کے تمام انتظٓامات کیے گئے تھے۔ عمرہ زائرین کے لیے اعتمرنا ایپ کے ذریعے تاریخ اور وقت لے لیا گیا،یہ کام تربیت یافتہ اہلکاروں کے سپرد کیا گیا ہے،زائرین کے ہر گروپ کو حرم شریف پہنچا کر اپنی نگرانی میں عمرہ کرایا جائے گا جبکہ مسجد نبوی شریف کی زیارت کے لیے مدینہ منورہ پہنچانے کے انتظامات بھی کرلیے گئے ،العمیری نے بتایا کہ نئے عمرہ پروگرام کے تحت زائر آن لائن مکمل عمرہ پیکیج حاصل کرسکتا ہے جس میں ہوائی جہاز کا ٹکٹ، ٹرانسپورٹ ، ہوٹل، کھانا پینا اور عمرہ کمپنی یا ادارے کا تعین تک شامل ہے، تمام سہولیات آن لائن حاصل کی جاسکتی ہیں۔