نیویارک (نوائے وقت رپورٹ) امریکہ میں ملعون سلمان رشدی پر چاقو سے حملہ ہوا جس کے نتیجے میں شدید زخمی ہو گیا۔ برطانوی نشریاتی ادارے کی رپورٹ کے مطابق شاتمِ رسول سلمان رشدی پر حملہ امریکی ریاست نیویارک کے علاقے شوٹاکوا میں جمعہ کی صبح سی ایچ کیو 22 کے عنوان سے منعقدہ تقریب میں سلمان رشدی کو خطاب کرنا تھا اور جیسے ہی وہ سٹیج پر آیا ایک شخص نے اس پر حملہ کردیا۔ رپورٹ کے مطابق حملہ آور نے سٹیج پر آ کر سلمان رشدی اور انٹرویو لینے والے ایک شخص پر چاقو سے حملہ کیا۔ بی بی سی کے مطابق سلمان رشدی کی گردن پر زخم آیا ہے۔ عینی شاہدین کے مطابق حملہ آور کو حراست میں لے لیا گیا ہے۔سلمان رشدی کو طبی امداد کیلئے ہیلی کاپٹر کے ذریعے ہسپتال منتقل کردیا گیا ہے۔