26اشیاء کی قیمتوں میں اضافہ ، ہفتہ وار مہنگائی 37.69فیصد ہوگئی۔ ادارہ شماریات

اسلام آباد (نوائے وقت رپورٹ) ملک میں مہنگائی کی مجموعی شرح 37.69 فیصد ہوگئی۔ ادارہ شماریات نے ہفتہ وار مہنگائی کے اعداد و شمار جاری کر دیئے۔ جس کے مطابق ہفتہ وار مہنگائی کی شرح میں 0.08 فیصد کمی ہوئی اور مجموعی شرح 37.69 فیصد رہی۔ ادارہ شماریات نے بتایا کہ ایک ہفتے کے دوران 26 اشیائے ضروریہ کی قیمتیں بڑھیں۔ ٹماٹر کی فی کلو قیمت میں 8 روپے58 پیسے اور انڈے کی فی درجن قیمت میں 7 روپے 35 پیسے کا اضافہ ہوا۔ ادارہ شماریات کے مطابق دال ماش 12 روپے87 پیسے، دال مونگ 6 روپے 54 پیسے، دال مسور 6 روپے 49 پیسے فی کلو اور لہسن 6 روپے70 پیسے فی کلو مہنگی ہوئی۔ دال چنا، بیف، تازہ دودھ، دہی، آلو، نمک اور آٹے کی قیمتوں میں بھی اضافہ ہوا۔ حالیہ ہفتے پیاز کی قیمت میں 9 روپے 59 پیسے اور گھی کی فی کلو قیمت میں 4 روپے 46 پیسے کمی آئی جبکہ چکن، چاول، کوکنگ آئل اور کیلا بھی سستا ہوا۔
مہنگائی