ہر شہری کم از کم ایک پودا لازمی لگائے:شاہد عباس جوتہ

گوجرانوالہ(نمائندہ خصوصی ) یوم آزادی پرگوجرانوالہ کو صاف سرسبز بنانے کیلئے آپ بھی اپنے گھروں، علاقے میں شجرکاری کریں، ہر شہری کم از کم ایک پودا لازمی لگائے۔یوم آزادی تقریبات کے انعقاد کے حوالے سے ڈی جی پی ایچ اے و سی ای او جی ڈبلیو ایم سی شاہد عباس جوتہ نے کہا ہے کہ پی ایچ اے کی جانب سے جشن آزادی شایان شان اورملی جوش و جذبے سے منانے کی تیاریاں جاری ہیں۔ اس بار 14 اگست پر پہلی بار شہریوں میں مختلف اقسام کے مقامی پھل دار پھول دار اور سایہ دار ماحول دوست پودے تقسیم کئے جائیں گے۔ شہدائے پولیس پارک جی ٹی روڈ کے باہر اور گلشن اقبال پارک میں پودے تقسیم کرنے کے سٹال لگائے جائیں گے۔ لیاقت پارک میں 13 اگست کی رات 12 بجے شاندار آتشبازی کا مظاہرہ کیا جائے گا۔ان خیالات کا اظہار انہوں نے جشن آزادی کی تیاریوں کے سلسلہ میں پی ایچ اے افسران کے ہمراہ میٹنگ کے دوران کیا۔