مظفرگڑھ،قصبہ گورمانی،رحیم یارخان، دنیاپور (نامہ نگار،نمائندہ نوائے وقت،کرائم رپورٹر) دو تیزرفتار مسافر ویگنوں کے درمیان تصادم کے نتیجے میں 4 افراد جاں بحق ، دیگر حادثات میں دو موٹر سائیکل سوار دم توڑ گئے ، 3 زخمی تفصیلات کیمطابق محمود کوٹ روڈ پر جمال والا چوک پر کوٹ ادو سے ملتان جانے والی ویگن اور مظفرگڑھ سے سنانواں جانے والی ویگن آپس میں ٹکراگئیں۔ریسکیو کے مطابق حادثے میں مسافر ویگنوں پر سوار 5 افرادشدید زخمی ہوگئے۔زخمیوں کو ڈی ایچ کیو ہسپتال مظفرگڑھ منتقل کیا جارہا تھا کہ راستے میں 4 افراد جاں بحق ہوگئے۔ریسکیو نے ایک زخمی کو ڈی ایچ کیو ہسپتال مظفرگڑھ منتقل کردیا۔ جاں بحق چاروں افراد کا تعلق قصبہ سناواں کی بستی سارنگ والا سے تھا۔رحیم یارخان سے کرائم رپورٹر کے مطابق صادق آباد کارہائشی50سالہ فقیر محمد اپنی موٹرسائیکل پر کام کے سلسلہ میں جارہا تھا کہ تیز رفتاری کے باعث موٹرسائیکل بے قابوہوکر سامنے سے آنیوالی موٹرسائیکل دھماکے سے ٹکراگیا،شدید زخمی ہوجانے پر فقیر محمد کو طبی امداد کیلئے شیخ زید ہسپتال منتقل کیاگیا جہاں وہ زخموں کی تاب نہ لاتے ہوئے دم توڑگیا،ہسپتال انتظامیہ نے کارروائی کے بعدنعش تدفین کیلئے ورثاء کے حوالے کردی۔دنیاپور سے نامہ نگار کے مطابق ملتان روڈ پر ٹرک کی موٹر سائیکل کی ٹکر سے موٹرسائیکل سوار نعیم احمد سکنہ جلہ آرائیں موقع پر ہی جاں بحق ہوگیا جبکہ اس کی بیوی مصباح بی بی اور تین ماہ کی بیٹی رمشا شدید زخمی ہوگئیں جنہیں ریسکیو ٹیم نے طبی امداد کے بعد ہسپتال منتقل کردیا ۔