لاہور(سپورٹس رپورٹر)انڈر 19 ایشیا کپ میں پاکستان نے افغانستان کو 83 رنز سے شکست دیکر ایونٹ میں مسلسل تیسری کامیابی حاصل کرتے گروپ سٹیج میں ناقابل شکست رہ کر پہلی پوزیشن برقرار رکھی ‘سیمی فائنل کیلئے کوالیفائی کرلیا۔دبئی میں جاری اے سی سی انڈر 19کرکٹ ایشیا کپ میں افغانستان نے پاکستان کیخلاف ٹاس جیت کر پہلے بائولنگ کا فیصلہ کیا اور پاکستانی ٹیم کو بیٹنگ کی دعوت دی۔پاکستانی ٹیم نے 303 رنز بنائے جبکہ پوری ٹیم 48 اوورز میں پویلین لوٹ گئی۔ شمائل حسین75‘ شاہزیب خان 79 ‘ریاض اللہ 73 رنز بناکر نمایاں رہے ۔اذان اویس 20، طیب عارف 6، عرفات منہاس 4، سعد بیگ اور عامر حسن 8 ، خبیب خلیل 3 اور عبید شاہ ایک رن بناکر آؤٹ ہوئے۔محمد ذیشان بغیر کوئی رن بنائے پویلین لوٹ گئے۔304 رنز کے ہدف کے تعاقب میں افغانستان کے بیٹرز پاکستانی بائولرز کے سامنے جم کر نہ کھیل سکے اور پوری افغان ٹیم 49 ویں اوور میں 220 رنز پر آؤٹ ہوگئی۔ نعمان شاہ نے 54 ‘وفی اللہ اور فریدون نے 32،32 رنز کی اننگز کھیلی۔ عبید شاہ اور طیب عارف نے 3،3 ، خوبیب خلیل نے 2، عامر حسین اور شمائل نے ایک ایک وکٹ لی۔شمائل حسین کو میچ کا بہترین کھلاڑی قرار دیا گیا۔