جیسن گلیسپی کا اچانک استعفی اور پی سی بی کا انکار،اصل وجہ کیا ۔۔؟

پاکستان کرکٹ ٹیم کے ریڈ بال ہیڈ کوچ جیسن گلیسپی نے اپنے مطالبات نہ مانے جانے پر مستعفی ہونے کا فیصلہ کیا۔ذرائع کے مطابق سلیکشن کمیٹی کا حصہ برقرار نہ رہنے پر جیسن گلیسپی کی ناراضگی شروع ہوئی۔انہوں نے سلیکشن کمیٹی کا حصہ برقرار نہ رہنے کے بعد دونوں فارمیٹ کا ہیڈ کوچ بننا چاہا اور مزید معاوضے کا بھی مطالبہ کیا۔ ذرائع کا کہنا ہے کہ معاوضے میں اضافے کے مطالبہ کو چیئرمین محسن نقوی نے انکار کر دیا اور انہیں پاکستان میں زیادہ رہنے کا کہا جس پر جیسن گلیسپی رضامند نہیں ہوئے۔جیسن گلیسپی نے آج ساوتھ افریقہ پہنچنا تھا اور پری ٹیسٹ سیریز کیمپ کی نگرانی کرنا تھی تاہم انہوں نے ساوتھ افریقہ کے خلاف ٹیسٹ سیریز سے قبل ہی استعفیٰ دے دیا۔جیسن گلیسپی کے استعفیٰ کے بعد پی سی بی نے عاقب جاوید کو عبوری ریڈ بال ہیڈ کوچ مقرر کیا۔واضح رہے کہ گیری کرسٹن نے بھی سیریز کے علاوہ پاکستان رہنے سے انکار کیا تھا، جبکہ کرسٹن اور گلیسپی اپنی پسند کے سپورٹ اسٹاف کا بھی مطالبہ کرتے تھے۔ جیسن گلیسپی نے گزشتہ روز اپنے عہدے سے استعفیٰ دیا، ماضی میں  گیری کرسٹن نے بھی دورہ آسٹریلیا سے قبل استعفیٰ دیا تھا۔