لاہور (اپنے نمائندے سے)کھانا پکاتے خانہ بدوش کی جھگی میں آگ لگنے سے چار بہن بھائی جھلس کر جاں بحق ہو گئے۔ ذرائع کے مطابق سبزہ زار کیو بلاک کے رہائشی خانہ بدوش یاسین کی بیوی بشیراں اپنی جھگی میں کھانا پکا رہی تھی کہ ہوا کے ایک تیز جھونکے سے آگ کی ایک چنگاری قریب ہی پڑے کپڑوں کے ڈھیر پر جا گری جس نے دیکھتے ہی دیکھتے پوری جھگی کو اپنی لپیٹ میں لے لیا اور جھگی میں موجود بچوں کو باہر نکلنے کا موقع نہ مل سکا اور وہ آگ کی لپیٹ میں آ کر جاں بحق ہو گئے۔ جاں بحق ہونے والے بچوں میں ڈیڑھ سالہ قاسم، چار سالہ فرزانہ، سات سالہ نگینہ اور دس سالہ آصف شامل ہیں اطلاع ملنے پر فائر بریگیڈ کی ٹیمیں موقع پر پہنچ گئیں اور آگ پر قابو پا کر نعشوں کو ہسپتال منتقل کیا۔