چیئرنگ کراس پر ہونے والے دھماکے کے بعد مال روڈ پر قیامت ٹوٹ پڑی اور لوگ دیوانہ وار نم آلود آنکھوں کے ساتھ اپنے پیاروں کو تلاش کرتے رہے۔ شہری شدید پریشان اور روتے رہے اور اپنے پیاروں کی خیریت دریافت کرتے رہے۔ اندرون و بیرون ملک سے شہریوں کی بڑی تعداد اپنے پیاروں کو فون کرتی رہی اور فون کالز کا تانتا بندھ گیا۔ فون کالز کا یہ سلسلہ گھنٹوں جاری رہا، شہری انتہائی فکرمند رہے۔ دوسری جانب دھماکے کے بعد علاقہ میں تمام دکانیں بند کردی گئیں اور شہری شدید خوف و ہراس کا شکار ہوگئے۔ کئی گھنٹے تک دکانیں بند رہیں جبکہ علاقہ میں لائٹ بھی بند کردی گئی۔ شہریوں کی بڑی تعداد اپنے پیاروں کو تلاش کرتی رہی اور دیوانہ وار روتے رہے۔ ہر طرف چیخ و پکار مچ گئی۔ امدادی کارروائیوں کے دوران بھی شہری اپنے پیاروں کو تلاش کرتے رہے اور اِدھر اُدھر بھاگتے رہے۔ وہاں موجود افراد سے اپنے پیاروں کے متعلق پوچھتے رہے۔