تائیوانی صدر کی الیکشن جیتنے کے بعد اعلیٰ امریکی اہلکار سے ملاقات

تائے پی (آن لائن) تائیوان کی خاتون صدر سائی انگ وین نے دوسرے مدتِ صدارت کا الیکشن جیتنے کے بعد ایک اعلیٰ امریکی اہلکار سے ملاقات کی ہے۔ انہوں نے گیارہ جنوری کے صدارتی الیکشن میں اپوزیشن کی نیشنلسٹ پارٹی کے امیدوار کو بھاری سبقت سے شکست دی ہے۔ سائی انگ وین نے امریکی سفارت کار برینٹ کرسٹینسن سے ملاقات دارالحکومت تائی پے میں کی۔ کرسٹینسن امریکی انسٹیٹیوٹ برائے تائیوان کے سربراہ ہیں۔ خاتون صدر نے الیکشن میں کامیابی پر امریکی سفارت کار کا شکریہ ادا کیا کہ انتخابی عمل میں اْن کی حمایت میں تسلسل قائم رکھا گیا۔ یہ امر اہم ہے کہ تائیوانی صدر امریکا کے ساتھ ملکی تعلقات کو مزید مستحکم کرنے کی خواہش رکھتی ہیں۔