لاہور (نامہ نگار) ڈاکوؤں اور چوروں نے  متعدد شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں، گاڑیاں اور دیگر سامان لوٹ لیا۔ تفصیلات کے مطابق ڈاکوؤں نے ہربنس پورہ کے علاقے میں شاہ زیب کے گھر گھس کر اہلخانہ کو  یرغمال بناکر 7 لاکھ 80ہزار روپے مالیت کی نقدی، طلائی زیورات، موبائل فون اور دیگر سامان، کاہنہ میں عاشر حسین کے گھر سے 5لاکھ 10 ہزار روپے مالیت کی نقدی، طلائی زیورات اور دیگر سامان، راوی روڈ کے علاقے میں مشہود اور اس کی فیملی سے 3لاکھ 70 ہزار روپے مالیت کی نقدی، طلائی زیورات اور موبائل فون، مناواں کے علاقے میں وسیم سے 2 لاکھ 30 ہزار روپے نقدی اور موبائل فون، اسلام پورہ میں فقیر احمد سے40 ہزار روپے نقدی اور موبائل فون، ماڈل ٹاؤن کے علاقے میں یونس سے 60 ہزار روپے نقدی اور موبائل فون، گوالمنڈی میں ذوالفقار سے 20 ہزار روپے اور موبائل فون، شادمان میں عامر سے 15 ہزار روپے نقدی اور موبائل فون لوٹ لیا۔ چوروں نے مصطفی ٹاؤن اور شیراکوٹ کے علاقوں میں سے 2گاڑیاں جبکہ پرانی انارکلی، ہنجروال، سندر، لوئر مال، شیراکوٹ، بادامی باغ، سمن آباد، نشتر کالونی اور ٹاؤن شپ کے علاقوں میں سے 9موٹر سائیکلیں چوری کر لیں۔