بھابی ہم پاکستانی آپ سے محبت کرتے ہیں:سوشل میڈیا پر ثانیہ مرزا کو مبارکباد

لاہور(سپورٹس ڈیسک )ومبلڈن ٹینس ٹورنامنٹ میں مارٹینا ہنگس کے ہمراہ خواتین کا ڈبلز مقابلہ جیتنے پر بھارتی ٹینس سٹار ثانیہ مرزا کو نہ صرف بھارت بلکہ پاکستان سے بھی مبارکبادیں مل رہی ہیں۔ ثانیہ مرزا پاکستانی کرکٹر شعیب ملک کی اہلیہ ہیں اور سری لنکا میں پاکستانی ٹیم کے ساتھ موجود شعیب ملک نے اپنی اہلیہ کو مبارکباد دیتے ہوئے ان کی تصویر شیئر کی اور لکھا، ’مجھے ان پر فخر ہے۔ عزم، نظم و ضبط، توجہ اور بڑے خوابوں سے ہی کھلاڑی بنتے ہیں۔بھارتی صدر پرناب مکھرجی اور وزیرِ اعظم نریندر مودی نے بھی ثانیہ مرزا کو مبارکباد دی ہے۔ چندن ساہو نے لکھا کہ ’آخر وہ پہلا دن آ ہی گیا جب بھارت اور پاکستان دونوں خوش ہیں۔ پاکستان کے عمیر عالم نے لکھا، ’بھابی، یہ بھارت کے بارے میں نہیں، یہ ہماری بھابی کے بارے میں ہے۔ بھابی آپ جہاں بھی ہیں آگے بڑھتی رہیں۔ ہم پاکستانی آپ سے محبت کرتے ہیں۔