لاہور (لیڈی رپورٹر) نواز شریف اور انکی صاحبزادی مریم نواز کے پرتپاک استقبال کیلئے مسلم لیگ ن شعبہ خواتین کی رہنمااورکارکنان کا جوش و خروش نکتہ عروج کو پہنچ گیا۔ گرفتاریوں اور پکڑ دھکڑ سے ہراساں ہونے کی بجائے تمام رکاوٹیں توڑ کر استقبال کیلئے ائرپورٹ پہنچنے کا اعلان کر دیا۔ نواز شریف کی تصاویرسے آراستہ نئے سبز کپڑے سلوا لئے، دوپٹے رنگوا لیے، گزشتہ روز نوائے وقت سے گفتگومیں شعبہ خواتین لاہور کی سربراہ شائستہ پرویزملک نے کہاکہ ہم پرامن لوگ ہیں ہمیں مت روکیں تاہم ہم گرفتاریوں سے بھی نہیں ڈرتیں، کوئی بھی ہمارے قائد کے استقبال کا راستہ روک سکتا۔ راحیلہ خادم حسین اور شمیلہ اسلم نے کہاکہ خواتین استقبال کیلئے بہت پرجوش ہیں، ہر حلقے میں خواتین کی میٹنگز ہوتی رہیں، گاڑیاں پوسٹرز، بینرز، سٹکرز سے آراستہ کرلی گئیں ، آج نماز جمعہ کے بعد لاہور ائر پورٹ کارخ کریں گی۔ڈاکٹر فرزانہ نذیراور ارم حسن باجوہ نے کہاکہ لیگی کارکنوںاور انکی گھریلو خواتین کو ہراساں کیا جا رہا ہے، ہم کوئی احتجاج تو نہیں کررہے دھرنا دینے تو نہیں جارہے ہم تو اپنے قائد کو ویلکم کرنے جارہے ہیں۔ ہمیں پیدل بھی جانا پڑا تو جائیں گی۔ نگہت شیخ نے کہاکہ ہمارے پرامن استقبال کی راہ میں روڑے اٹکانے سے نگران حکومت کی بوکھلاہٹ وا ضح ہورہی ہے۔ حنا بٹ نے کہاکہ خواتین کی طاقت بہت بڑی طاقت ہے اور لیگی خواتین بڑی تعداد میں اپنے قائدین کے استقبال کیلئے تیارہیں۔ جنرل سیکرٹری زرقا جاوید اور نسیم بانو نے کہاکہ ہم پھولوںکی پتیاں ساتھ لے کر جائیں گی۔