ڈاکوؤں کی فائرنگ سے نوجوان زخمی‘ مرچوں سے لوڈ ٹرک چھین لیاگیا

شجاع آباد‘ جلال پورپیروالہ (نمائندہ خصوصی‘ نامہ نگار)شجاع آباد میں ڈاکوؤں کی فائرنگ سے نوجوان زخمی‘ جلال پور میں 4مسلح افراد نے گن پوائنٹ پرلاکھوں مالیت کی مرچوں سے لوڈ ٹرک لوٹ لیا۔تفصیل کے مطابق موضع بیٹ کیچ کی بستی نذیرآباد کا بیوپاری اپنے بھانجے اکرم ، بھتیجے اسد اور ٹرک ڈرائیور کے ہمراہ ٹرک پر 26لاکھ مالیت کی مرچیں لوڈ کرکے لے جارہے تھے کہ خانبیلہ کے قریب حضور موڑ پر 4مسلح افراد نے انہیں گن پوائنٹ پر روک لیا۔ انہیں ٹرک سے نیچے اتار کران کی آنکھوں اوربازوئوں پر کپڑا باندھ کر کھیتوں میں بٹھا دیا ۔2مسلح افراد مرچوں سے لوڈ ٹرک لے کر فرار ہوگئے جبکہ 2مسلح افراد جکڑے ہوئے افراد کی نگرانی کرتے رہے۔ مسلح افراد نے ان سے 4 موبائل فون اور ہزاروں کی نقدی بھی چھین لی۔2گھنٹوں بعد ایک موٹر سائیکل سوار آکر ان دونوں مسلح افراد کو لیکر فرار ہوگیا۔شورواویلا پر اہل علاقہ نے وہاں پہنچ کر جکڑے ہوئے لوگوں کو آزاد کروایا۔اطلاع ملنے پر پولیس نے کاروائی شروع کردی ہے۔ شجاع آباد میں خیر پور روڈ پر ڈیرہ غضنفر الزماں کے قریب نامعلوم ڈاکوؤں نے مزاحمت پر 23 سالہ ذیشان کو گولیاں ماردی جسے ریسکیو 1122 نے تشویش ناک حالت میں تحصیل ہیڈ کوارٹر ہسپتال شجاع آباد منتقل کردیا جسے حالت نازک ہونے کی بنا پر نشتر ہسپتال ملتان منتقل کردیا گیا، پولیس تھانہ سٹی شجاع آباد نے واقعہ کی تحقیقات شروع کردی ہے۔