بابر اعظم کو کوچنگ کی ضرورت نہیں :محمد یوسف

لاہور(سپورٹس رپورٹر) قومی ٹیم کے بیٹنگ کوچ محمد یوسف نے کہا ہے کہ بابر اعظم کو کسی کوچنگ کی ضرورت نہیں ہے، بابر کو میری رائے میںکچھ سیکھنے کی ضرورت نہیں ہے۔ وہ اچھی کارکردگی کا مظاہرہ کر رہا ہے۔ میںہمیشہ اس بات کو یقینی بنانے کی کوشش کرتا ہوں کہ کسی ایسے کھلاڑی کو پریشان نہ کیا جائے جو غیر معمولی کارکردگی کا مظاہرہ کر رہا ہو۔ امام الحق کی ان کی ناقابل یقین رن سکورنگ فارم کی بھی تعریف کی اور کہا کہ وہ اپنے نقطہ نظر میں رد و بدل کے عادی نہیں ہیں۔ امام کیلئے بھی ایسا ہی ہے، جیسا کہ وہ بھی بہت اچھا کر رہے ہیں، اگر اس کے نقطہ نظر میں کوئی معمولی غلطی ہے تو میں اسے بتاتا ہوں۔ ہمیشہ کوشش کرتا ہوں کہ ان بیٹرزکو پریشان نہ کروں، جو اچھی کارکردگی کا مظاہرہ کر رہے ہیں۔ مڈل آرڈر کے بارے میں کہا کہ کھلاڑی اور انتظامیہ مسائل کو دورکرنے کیلئے سخت محنت کر رہے ہیں۔ جیسا کہ آپ نے مڈل آرڈر کا ذکر کیا، فوری سنگلزسکور کرنا ان کیلئے بہت ضروری ہے۔ ہم نے ایک کیمپ لگایا اور ایک نیٹ میں ہم کھلاڑیوں کو سوئپ شاٹس کھیلنے کی ہدایت کر رہے تھے۔ جب کوئی بیٹرسپنرز کوسویپ شاٹ کھیلتا ہے اس کے بعد گیند باز یا تو پوری لینتھ ڈلیوری گیند کرے گا یا اس کی بجائے شارٹ آف لینتھ ڈلیوری کرے گا۔ لہذا، گیند کی پچنگ میں یہ تغیر، بیٹر کو آزادانہ طور پر سکور کرنے کی اجازت دیتا ہے اورسٹرائیک کی گردش بھی آسان ہو جاتی ہے.یہاں یہ بات قابل ذکر ہے کہ قومی ٹیم حال ہی میں مشکل مڈل آرڈر سے دوچار ہے کیونکہ اس نے ویسٹ انڈیز کیخلاف حال ہی میں ختم ہونے والی ہوم ون ڈے سیریز میں مایوس کن مظاہرہ کیا تھا۔