کراچی(اسپورٹس رپورٹر منیر احمد ) ویسٹ انڈیز کے خلاف سریز میں کامیابی نے گرین شرٹس کی قسمت جگا دی جب کہ ٹیم نے سپرلیگ میں  تیسری پوزیشن سنبھال لی۔پاکستان نے کیریبیئن ٹیم کے خلاف ہوم سیریز کا آغاز آئی سی سی ورلڈکپ سپر لیگ میں دسویں پوزیشن کے ساتھ کیا، تب اس کے مجموعی پوائنٹس 60 تھے جو12 میچز میں ملنے والی 6 فتوحات کی بدولت حاصل کیے، نیدرلینڈز پر کلین سوئپ کرکے آنے والی ویسٹ انڈین ٹیم 80 پوائنٹس کے ساتھ چوتھے نمبر پر موجود تھی۔گرین شرٹس نے ملتان کی سخت گرمی کو خاطر میں نہ لاتے ہوئے پہلے ون ڈے میں کامیابی حاصل کی تو پوائنٹس 70 ہوگئے اورساتویں پوزیشن سنبھال لی، مگر جیسے ہی دوسرے میچ میں کامیابی حاصل ہوئی تو گرین شرٹس کی پوزیشن کو بھی پر لگ گئے اور مہمان سائیڈ سے چوتھا درجہ چھین لیا، اب پاکستان کے مجموعی پوائنٹس 80 ہوچکے جواس نے 14 میچز میں سے ملنے والی 8 فتوحات کی وجہ سے حاصل کیے ہیں۔ٹیم کو رواں دورانیے کے 6 میچز میں شکست ہوچکی، اب پاکستانی ٹیم نے تیسرا میچ جیت کر سیریز میں کلین سوئپ کر لیا  اور مجموعی پوائنٹس تیسرے نمبر پر موجود افغانستان کے برابر 90 ہو ہوگئی ہے اور تیسری پوزیشن پر آگئی ۔اس وقت سپر لیگ پوائنٹس ٹیبل کے ٹاپ پر بنگلہ دیش کی ٹیم 120 پوائنٹس کے ساتھ موجود ہے،یہ اس نے 18 میں سے 12 میچز جیت کر حاصل کیے، دوسرے نمبر پر انگلینڈ کے 95 پوائنٹس ہیں، اس نے 15 میں سے 9 میچز جیتے، 5 میں شکست ہوئی جبکہ ایک بے نتیجہ رہاچھٹے نمبر پر بھارت اور ساتویں پر آسٹریلیا موجود ہے، آئرلینڈ کا آٹھواں اور سری لنکا کا نواں نمبر ہے، فی الحال نیوزی لینڈ اور جنوبی افریقہ بالترتیب دسویں اور11ویں نمبر پر براجمان ہیں۔