کیلیفورنیا (اے پی پی) سوئٹزرلینڈکے بین لاقوامی شہرت یافتہ ٹینس سٹار اور سابق عالمی چیمپئن راجر فیڈرر اور سپین کے رافیل نڈال پری باس اوپن ٹینس ٹورنامنٹ کے چوتھے راﺅنڈ میں پہنچ گئے۔ رافیل نڈال بآسانی ایونٹ کے چوتھے راﺅنڈ میں پہنچے انکو تیسرے راﺅنڈ میں اپنے حریف کے خلاف واک اوور مل گیا۔ تفصیلات کے مطابق انڈین ویلز، کیلیفورنیا میں جاری مینز ایونٹ کے تیسرے راﺅنڈ میں سوئٹزرلینڈکے بین الاقوامی شہرت یافتہ ٹینس سٹار اور سابق عالمی چیمپئن راجر فیڈرر نے انتہائی شاندار کارکردگی کا مظاہرہ کرتے ہوئے کروشیا کے آئیوان ڈوڈنگ کو سٹریٹ سیٹس میں 6-3 اور 6-1 سے شکست دیکر ایونٹ کے چوتھے راﺅنڈ کےلئے کوالیفائی کیا۔ ایک اور میچ میں سپین کے رافیل نڈال کو ارجنٹائن کے لیونارڈو میئر کے خلاف واک اوور مل گیا اور وہ بآسانی ایونٹ کے چوتھے راﺅنڈ میں پہنچ گئے۔ جمہوریہ چیک کے ٹامس برڈوچ نے جرمنی کے فلورین میئر کو 6-4 اور 6-1 سے مات دی۔ تیسرے راﺅنڈ میں بیلاروس کی عالمی نمبر ایک وکٹوریہ آزارینکا نے بیلجیئم کی کرسٹن فلپکیز کو پہلے سیٹ میں 3-6 کی شکست کے باوجود اگلے دونوں سٹریٹ سیٹس میں 6-3 اور 6-0 سے ہرا کر ایونٹ کے چوتھے راﺅنڈ کے لئے کوالیفائی کرلیا۔ آسٹریلیا کی سمانتھا سٹوسر نے چین کی شوائی پینگ کو 6-3،3-6 اور 6-2 سے شکست دی۔ ڈنمارک کی کیرولین وزنائیکی نے روس کی ایلینا ویسنینا کو سٹریٹ سیٹس میں 6-2 اور 6-1 سے مات دی۔ روس کی نادیہ پٹروا نے جرمنی کی جولیا گورجز کو 6-1 اور 6-2 سے ہرایا اور جرمنی کی انجلی کیو کربر نے بیلجیئم کی یانینا ویکمیئر کو 6-1 اور 7-6(7-4) سے ہرا کر چوتھے راﺅنڈ میں جگہ بنائی۔