لاہور(سپورٹس رپورٹر) پاکستان سکواش فیڈریشن کے زیر اہتمام پنجاب سکواش کمپلیکس میں جاری ایف ایم سی پاکستان انٹرنشنل سکواش سرکٹ ون ٹورنامنٹ کا کوارٹر فائنل مرحلہ مکمل ہو گیا۔ ناصر اقبال، دانش اطلس، عامر اطلس اور فرحان زمان نے سیمی فائنل کے لیے کوالیفائی کر لیا ہے۔ گذشتہ روز کھیلے جانے والے کوارٹر فائنلز کے پہلے مقابلے میں ناصر اقبال نے محمد ثاقب یوسف کے خلاف تین صفر سے کامیابی اپنے نام کی۔ ناصر اقبال کی کامیابی کا سکور 11-4, 11-5, 11-9 رہا۔ دوسرے میچ میں دانش اطلس خان نے طیب اسلم کو تین سیٹ سے زیر کیا۔ دانش اطلس کی کامیابی کا سکور 11-6, 13-11, 11-8 رہا۔ تیسرے کوارٹر فائنل میں فرحان محبوب عامر اطلس کے خان میچ میں ریٹائر ہرٹ ہو گئے۔ چوتھے اور آخری میچ میں فرحان زمان نے خواجہ عادل مقبول کے خلاف کامیابی حاصل کی ۔ عادل مقبول بھی پہلے سیٹ میں ریٹائر ہرٹ ہو گئے۔ ٹورنامنٹ میں آج کھیلے جانے والے سیمی فائنلز میں ناصر اقبال کا مقابلہ دانش اطلس سے جبکہ عامر اطلس فرحان زمان کے مد مقابل ہونگے۔