شاہ کوٹ (نامہ نگار)  شاہ کوٹ کے نواحی گائوں  ڈلہ چندہ سنگھ  میں  کمرے میں گیس بھرنے سے دم گھٹنے  کے باعث 4 سگی بہنیں اور بھاوج  جاں بحق ہو گئی جبکہ کمسن بچہ اور اس کا باپ  معجزانہ  طور پر محفوظ رہے۔  تفصیلات  کے مطابق نواحی گائوں ڈلہ چندہ سنگھ میں محنت کش  فریاد حسین اپنی بیوی 22 سالہ زبیدہ بی بی،  3 ماہ کے بیٹے شہزاد  اور4 بھتیجیوں  9  سالہ حلیمہ، 14 سالہ اقصیٰ، 16 سالہ نبیلہ اور 18 سالہ انعم  کے ساتھ گھر کے ایک کمرے میں گیس ہیٹر  جلا کر سو گئے کہ رات گئے ہیٹر بند ہو جانے سے کمرے میں گیس  بھر گئی جس کے نتیجے  میں چاروں سگی بہنیں اور ان کی بھاوج  زبیدہ  بی بی دم گھٹنے سے جاں بحق ہو گئیں  جبکہ  3 ماہ کا بچہ شہزاد  اور اس کا باپ فریاد   حسین معجزانہ طور پر زندہ  بچ گئے۔ فریاد  حسین کو نیم بے ہوشی  کی حالت  میں  طبی امداد  کی فراہمی کے لئے تحصیل  ہیڈ کوارٹر ہسپتال  شاہ کوٹ لایا گیا جہاں  اس کی حالت تسلی  بخش   بیان  کی جاتی ہے۔  بتایا گیا ہے کہ جاں بحق ہونیوالی  بہنوں  کا والدہ عبدالمجید  فوت ہو چکا ہے جبکہ ان کی والدہ  لاہور  میں  اپنے میکے کے گھر گئی ہوئی تھی۔علاوہ ازیں نماز مغرب کے بعد ڈلہ چندہ سنگھ میں چاروں سگی بہنوں اور بھاوج کے ایک ساتھ جنازے اٹھے تو گاؤں میں قیامت صغریٰ کا منظر بپا ہو گیا۔ ہر طرف آہ و بکا اور چیخ و پکار کی آوازیں سن کر موقع پر سناٹا چھا گیا۔ ماں اور لواحقین خواتین پر غشی کے دورے پڑنے لگے۔ پورے گاؤں میں سارا دن فضا سوگوار رہی۔ تھانہ صدر پولیس شاہ کوٹ نے حادثہ کی رپورٹ درج کرا دی۔ چودھری برجیس طاہر اور رانا محمد ارشد نے سانحہ پر شدید افسوس کا اظہار کیا۔